नेपाललाई हिन्दुराष्ट्र घोषणा गर्न सकिन्छ : देउवा

काङ्ग्रेस बरिष्ठ नेता शेरबहादुर देउवाले नेपाललाई हिन्दुराष्ट्र घोषणा गर्न सकिने बताएका छन् । नेपाल प्रेस युनियन दाङले आज तुलसीपुरमा गरेको पत्रकार सम्मेलनमा बोल्दै नेता देउवाले इच्छा नहुँदा नहुँदैपनि आफु धर्मनिरपेक्षतामा गएको बताए ।

उनले भने,‘ संसदमा हाम्रो पार्टीको दुइ तिहाई

बहुमत भएन । यही भएर धर्मनिरपेक्ष घोषणा गर्न बाध्य भएँ ।’

८० प्रतिशत जनताको हिन्दुधर्म कायम राख्नुपर्ने चाहाना भएकाले कांग्रेसको बहुमत भएमा हिन्दु राष्ट्र घोषणा गर्न सकिने बताए । पार्टीको१३ औं महाधिवेशनमा सभापतिका दावेदार देउवाको यो भनाई अर्थपूर्ण मानिएको छ ।यस अघि कांग्रेसका केही नेताले हिन्दु राष्ट्रको पक्षमा लविङ गर्दै आएका थिए ।

त्यसैगरी उनले आफु सभापति भए पार्टी बहुमत प्राप्त र बलियोे हुने बताएका छन् । देउवाले आफु सभापति भए सदाका लागि पार्टी भित्रको गुटबन्दीको अन्त्य हुने दाबी गरे । गिरिजाबाबु र आफुले दुई कांग्रेसलाई एक गराएको भन्दै देउवाले पार्टीलाई एक गराउने दायित्व र कर्तव्य आफनो भएको बताए । त्यसैगरी उनले धनी र गरिबवीचको खालड पनि पुरिदिने बताएका छन् ।

पूर्व प्रधानमन्त्री समेत रहेका देउवाले मधेसी मोर्चाले राखेका सबै माग पुरा भइसकेको भन्दै अझै पनि सहमतिका लागि सिमाङ्कनका विषयमा लचिलो हुन तयार रहेको बताए । उनले कमैयाँ मुक्तिको नेतृत्व गरेको आफूलाई थारु बिरोधी भनेर गलत प्रचार गरेको बताए ।