मेरो जित सुनिश्चित जस्तै छ

लामो समयसम्म नेकपा एमालेको राजनीतिमा सक्रिय योगेन्द्र सङ्ग्रौला एउटा कुशल संगठन कर्ता, अनुभवी राजनीतिक कार्यकर्ता र सरल सामाजिक अभियन्ता हुनुहुन्छ । आगामी मंसिर २१ गते हुने निर्वाचनको लागि काठमाडौं क्षेत्र नं.६, प्रदेश–‘ख’ मा बाम गठबन्धनबाट साझा उमेद्वार सङ्ग्रौला विगतमा आफूले यस क्षेत्रमा गरेको काम, सामाजिक तथा राजनैतिक क्रियाकलाप र आम जनतासँगको सम्पर्कले यस प्रदेशबाट चुनाव जित्ने कुरामा ढुक्क हुनुहुन्छ । यतिबेला चुनावी कार्यक्रमहरूमा व्यस्त सङ्ग्रौलाका आफूलाई जनताले मत दिनुपर्ने कारण र आफूले जित्ने आधारहरू यस्तो रहेको बताउनुहुन्छ ।

१. चुनावी माहोल ः अहिले चुनावी माहोल राम्रो बन्दै गएको छ । प्रारम्भिक चरणको मत सर्भेक्षण र घरदैलोमा पुग्दा व्यक्त भएका जनताका भावनाहरू अत्यन्त उत्साहजनक राम्रो छ । म लगायत हाम्रो टिमले जित्छौं । साथीहरूमा केही सानातिना मनमुटावहरू थिए । ती सबै समाधान हुँदै गएका छन् । साथीहरू मप्रति अत्यन्त सकारात्मक हुनुहुन्छ ।

२. जित्ने आधारहरू ः मेरो जितको आधारहरूमा भर्खरै स्थानीय तहमा बाम गठबन्धनलाई खसेको मत परिणाम अन्य पार्टीहरूको भन्दा निकै बढी छ । बामपन्थीहरूको एकता होस् भन्ने आम जनसमुदायको भावना अनुसार अहिले त्यो एकता भएको छ । त्यस्तै स्थिर सरकार, सुशासन र समृद्ध नेपालको मुद्दालाई बाम गठबन्धनले जोडदार रूपमा उठाएको छ । राष्ट्रियएकता र वैदेशिक सम्बन्धका मुद्दाप्रति जनताले बाम गठबन्धन खासगरी नेकपा एमालेप्रति सकारात्मक भरोषा राखेकाले पनि हाम्रो जित्ने आधार बलियो हुँदै गएको छ ।

३. मत दिनुपर्ने कारण ः म पहिला २०४९ देखि–०५४ सम्म काठमाडौं नगरपालिका वडा नं. २ को वडा अध्यक्ष भएर काम गरेको व्यक्ति हुँ । मैले लामो समय यही क्षेत्रमा रहेर पार्टीको साँगठनिक तथा वैचारिक काम गर्दै आएको छु । म कानुनमा स्नातक छु र अधिवक्ता पनि हुँ । म यस क्षेत्रमा रहनुको नाताले यहाँका जनताले मबाट कानुनी, प्रशासनिक र न्यायिक निर्णयका कामहरू पनि छिटोछरितो र सहज ढङ्गले पाउने छन् । हाल म यही क्षेत्रमा स्थायी वसोवास गरिरहेको छु, मेरा प्रतिस्पर्धीहरूले बाहिरको भनेर हल्ला चलाएका छन् तर म बाहिरको व्यक्ति होइन । यो क्षेत्रलाई विकसित, समृद्ध र सुन्दर बनाउंदै लाने मेरा खास विकासका योजना र सोचहरू छन् । म क्रमशः यी कामहरू पूरा गर्दै जाने छु ।