काठमाडौँ, असोज २४ गते ।
नेपालीहरूको महान चाड विजयादशमी, शुभदीपावली, नेपाल सम्वत् र छठ पर्वको पावन अवसरमा संसाक मासिक, खोज अनलाइन र साहित्यकार खेलकुद समाज नेपालको संयुक्त आयोजनामा शुभकामना आदान–प्रदान,
रचना वाचन र स्रष्टा भेटघाट कार्यक्रम सम्पन्न गरियो ।
कार्यक्रमको प्रमुख अतिथि प्रा.डा. गार्गी शर्माले हिमालको चिसोमा बस्दा, चिसोको कारण केही गर्न नसक्ने सर्प लगाउने शिवजीको शक्ति सधैँ बढ्ने तर बाघ, सिंहमाथि बसेर तिनलाई तह लगाउने दुर्गाहरूको शक्ति सधैँ कमजोर बन्दै जाने, फेरि दुर्गा शक्तिको श्रोत भनेर हामी पूजा, आराधना पनि गरिरहने, यो हाम्रो धर्म र शक्तिको परम्परा बुझिनसक्नु र अचम्मको छ, भन्नुभयो । तर पनि हामी आफ्नो धर्म र परम्परा हो, यसलाई निरन्तर मान्दै आएका छौँ र पछि पनि मान्छौँ, डा. शर्माले भन्नुभयो ।
कार्यक्रमका विशिष्ट अतिथि टोखा न.पा.१० का वडा अध्यक्ष मधुसूदन पाण्डेले देशका उल्झन र अप्ठ्याराहरूमा सिर्जनाको तागत र शक्ति ठूलो हुने बताउँदै देशमा मडारिएको असजिलो अवस्थाहरूलाई सुल्झाउन कविका सिर्जनाहरूले काम गरून् भन्नुभयो । साहित्य र सिर्जनाको लागि आफ्नो सधैँ साथ र सहयोग रहने कुरा पनि अध्यक्ष पाण्डेले दोहो¥याउनुभयो ।
कार्यक्रमका सभापति डा.शैलेन्दुप्रकाश नेपालले नारीहरूको सम्मान, पूजा र शक्तिको वर्णन नै दसैँको सारभूत तत्व हो भन्नुहुँदै आज नेपाली नारीहरू जति पनि प्रताडित, पीडित र शोषित छन्, अग्र भागमा पुरुषहरू देखिए पनि यसो हुनुमा अदृश्य रूपमा नारीकै भूमिका बढी रहेको घटनाक्रहरूले देखाइरहेका छन्, भन्नुभयो ।
कार्यक्रममा आफ्ना शुभकामनासहित रचना वाचन गर्ने अन्य स्रष्टाहरूमा डा.सत्यराज थपलिया, विजयध्वज थापा, गुप्तबहादुर श्रेष्ठ, रत्नप्रसाद श्रेष्ठ अनामणि, कृष्णप्रसाद अधिकारी, टंक बहादुर खत्री, द्वारिका कुइँकेल, तारा के.सी., भैरबी ढुङ्गाना, उत्तम विचार भेटुवाल, प्रशान्त डंगोल, प्रकाश रोका, सन्दर्शिका अधिकारी र प्रकाश रोका हुनुहुन्थ्यो ।
संसाकका सम्पादक उमेश पाण्डेले संयोजन गर्नुभएको कार्यक्रममा खोज अनलाइनका सञ्चालक रत्नप्रसाद श्रेष्ठ अनामणिले अतिथिहरूमा स्वागत मन्तव्य राख्नुभएको थियो ।
