खोटाङ । उपप्रधान तथा स्वास्थ्यमन्त्री उपेन्द्र यादवले सरकारमा सहभागी हुनेबेला गरिएका सम्झौता कार्यान्वयन नभए सरकारबाट बाहिरिने बताएका छन् । संघीय समाजवादी फोरम खोटाङले बिहीबार दिक्तेलमा आयोजना गरेको पत्रकार सम्मेलनमा मन्त्री यादवले हालसम्म प्राप्त उपलब्धीलाई संस्थागत गर्ने, संघीय गणतन्त्र, समावेशिता र पहिचानको मुद्दालाई संस्थागत गर्ने मुद्दा पूरा नहुने अवस्था आए आफ्नो पार्टीको बाटो अलग हुने बताएका हुन् ।
‘राजनैतिक कारणहरु, मधेसी, आदिवासी जनजातीका मुद्दाहरु, महिलाका मुद्दाहरु, दलितका मुद्दाहरु, पिछिडिएका वर्ग र समुदायका मुद्दाहरु अहिले पनि सम्बोधन हुन बाँकी छ । त्यसलाई सम्बोधन गरेर जाने समझदारीमा हामी सरकारमा गएको हो,’ संघीय समाजवादी फोरमका अध्यक्ष समेत रहेका मन्त्री यादवले भने, ‘जुन कारणका लागि हामी सरकारमा समावेस भयौँ, त्यो भएन भने, हुन नसक्ने स्थिति भयो भने या गर्दिन भन्ने भयो भने त्यो बेला हाम्रो बाटो फरक हुन सक्छ। त्यो निश्चित हो । तर, अहिले नै सरकार छाड्ने भन्ने छैन ।’
मुलुकलाई गाँठो परेर बस्नबाट जोगाउँदै संविधान संशोधन लगायतका काम पूरा गर्नका लागि संघीय समाजवादी फोरम सरकारमा सहभागी भएको उपप्रधान एवं स्वास्थ्य मन्त्री यादवले स्मरण गरे। ‘हामी आएर यो सरकार बनेको पनि होइन । हामी नआउँदा सरकारको बहुमत जान्छ भन्ने पनि होईन । तर, दुई तिहाई पुर्याउनलाई हाम्रो आवश्यकता हो ।
हामीले दुई तिहाई पुर्याइदिएको हो, ताकी मुलुक गाँठो परेर नबसोस,’ स्वास्थ्य शिविर सञ्चालन काक्रममा दिक्तेल आइपुगेका यादवले भने, ‘संविधान संशोधनलगायतका सिस्टम सुधारको कामहरु अगाढि बढोस् । हाम्रो पार्टी सरकारमा निश्चित लक्ष्यका लागि गएको हो।’
मन्त्री यादवले मधेशमा अलग्गै राज्य बनाउने नारा लिएका सिके रावतले जेल बस्दा आत्तिएर मुद्दा छाडेको बताए । ‘पञ्चायत कालमा विभिन्न आन्दोलन गरिन्थ्यो, जेल परिन्थ्यो । दुई चार दिन जेलमा परेपछि कतिपय मान्छे आत्तिन्थे र म आक्कल झुक्कलमा परेको हुँ, म यो निर्दलीय व्यवस्था मान्छु भनेर कागज गर्थे र जेलबाट छुट्थे,’ यादवले भने, ‘सिकेजी चार महिना जेलमा बसे, आत्तिए र आत्मसमर्पण गरे । मधेशलाई अगल देश बनाउछु भन्ने मुद्धा छोडे, अव यस्तो कहिल्यै गर्दिन भनेर कागज गरेर छाडिए । भएको त्यत्ति हो ।’
