१.
आफ्नो चेतना स्तर सम्हाले बन्छ सय पनि लाख
शब्दहरू अरुलाई पस्किनु अघि आफैले चाख
दस रुपैँयाको लेखनीले कोरेर सिमित शब्द
सात जुनिको सम्बन्धलाई व्यर्थै नबनाऊ राख ।
२.
खुल्नेछ आकाश, जानेछ बादल हटेर
आउनेछ बहार राष्ट्रमा, युवा डटेर
मर्दा पर्दालाई चाहिने त्यो जोश, जाँगर
काँधमा बोकि, रातदिन नभनी खटेर ।
३.
पृथ्वीले परिक्रमा गर्दा आफैँलाई घुमेको हुन्छ
राष्ट्रको विकास गर्दा गर्वले छाती फुलेको हुन्छ
पौरखी युवाले धर्तिमा रक्तपसिना बगाउँदा
सबै मातृले आफ्ना सन्तानको माथि चुमेको हुन्छ ।
४.
भेटीले भरिएको मन्दिरको पत्थरले के बोल्छ
चिहाउँ खरले छाएका झुपडी, अभावले पोल्छ
गरिबीको पीडाले दिएको असह्य यातना देख्दा
सबै युवाको रगत उम्ली, रिसले जोखिम मोल्छ ।
५.
उच्च ताप दिई फलाम गलाउने उनै युवा हुन्
बाँझो भूमि सिंचाइ गरी जगाउने उनै युवा हुन्
घरपरिवारको भार होस् या देशको जिम्मेवारी
बोकेर सुन्दर संसार बनाउने उनै युवा हुन्
