काठमाडौँ । साहित्य र लेखापरीक्षण (चार्टर्ड एकाउन्टेन्सी) क्षेत्रमा सक्रिय सञ्जु अधिकारीले आफ्ना दुई नयाँ कृति—उपन्यास ‘सनम’ र कथासङ्ग्रह ‘मानस’ एक औपचारिक समारोहबीच हालै सार्वजनिक गरेकी छिन्। राजधानीको ‘रामालय इभेन्ट्स’मा आयोजित विशेष कार्यक्रममा यी दुवै कृति विमोचन गरिएका हुन्। बी.एन. पुस्तक प्रकाशनद्वारा प्रकाशित तथा वितरित यी कृतिहरूमा उपन्यास र कथा विधामा अधिकारीको मौलिक लेखनशैली सुन्दर ढङ्गले प्रस्तुत भएको छ।
साहित्यकार डा. शैलेन्दु प्रकाश नेपालको प्रमुख आतिथ्यतामा यो कार्यक्रम सम्पन्न भएको थियो। कार्यक्रममा बोल्दै प्रमुख अतिथि डा. नेपालले सञ्जु अधिकारीले जीवनको यथार्थलाई आफ्ना कथामा गहिरो ढङ्गले उतारेको तर्क गरे। त्यसैगरी, ‘नारी’ मासिककी सम्पादक उपासना घिमिरेले अधिकारीको लेखनशैली अत्यन्त सरल र मर्मस्पर्शी रहेको विचार व्यक्त गरिन्। समारोहमा उपस्थित अन्य अतिथिहरूले पनि यी दुवै कृतिले नेपाली साहित्यमा अर्थपूर्ण उपस्थिति जनाएको धारणा राखेका थिए।
नेपाली साहित्यमा निरन्तर कलम चलाउँदै आएकी अधिकारीका यसअघि ‘इन्द्रेणी स्पर्श’ र ‘मन’ पुस्तक पनि प्रकाशित भइसकेका छन्। ‘सनम’ र ‘मानस’ सार्वजनिक भएपछि उनका कुल प्रकाशित कृतिको सङ्ख्या चार पुगेको छ, जसले उनको साहित्यिक यात्रालाई अझ समृद्ध बनाएको छ।
कार्यक्रमको अन्त्यमा उपस्थित साहित्यकार तथा अतिथिहरूले नयाँ कृतिका लागि सञ्जु अधिकारीलाई बधाई दिएका थिए। साथै, आगामी दिनमा उनको साहित्यिक यात्रा थप सुमधुर बन्दै उत्तरोत्तर प्रगतिको बाटोमा अगाडि बढोस् भन्दै शुभकामना व्यक्त गरिएको थियो
