बाबुरामको नयाँ शक्तिको प्रारम्भिक कमिटि आज घोषणा हुँदै

काठमाडौं : डा. बाबुराम भट्टराईको नेतृत्वमा नयाँ शक्ति निर्माण अभियानलाई अझै शसक्त पार्न राष्ट्रिय  परिषद्को प्रारम्भिक स्वरुप आजै घोषणा हुँदैछ।

अल्फाबेटामा दिउँसो एक बजे आयोजित कार्यक्रममा नयाँ शक्ति अभियानको प्रारम्भिक  स्वरुप घोषणा गर्ने तयारी छ । पहिलो चरणमा करिब सय सदस्यीय काउन्सिल घोषणा हुने नयाँ शक्ति अभियानका एक सदस्यले अन्नपूर्ण अनलाइनसँग बताए । यसलाई क्रमशः विस्तार गरिने छ ।

यो अभियानले हरेक जिल्ला र निर्वाचन क्षेत्रमा नयाँ शक्ति अभियानलाई संचालन गर्नेछ । नयाँ शक्तिलाई पार्टीको रुपमा रुपान्तरण गर्नका लागि पनि यही संरचनाले आवश्यक तयारी गर्नेछ ।

आज घोषणा हुने नयाँ शक्ति अभियानमा माओवादी नेताहरु बाहेक विभिन्न क्षेत्रका नयाँ अनुहार पनि समावेश हुँदैछन् । पूर्वसचिव रामेश्वर खनाल, प्रविण मिश्र, कलाकार सरोज खनाललगायत स्वतन्त्र छवि भएका व्यक्तिहरु पनि प्रारम्भिक काउन्सिलमा रहने भएका छन् । केही कलाकार र व्यवसायी पनि याे अभियानमा स‌ंगठित हुँदैछन्।

नयाँ संविधानको घोषणा भएपछि बाबुरामले एमाओवादी छोडेर नयाँ शक्ति अभियान थालेका हुन्। एमाओवादीमा छँदा बाबुरामसँग निकट रहेका देवेन्द्र पौडेललगायतका नेताहरु नयाँ शक्तिमा संगठित भइसकेका छन् भने एमाओवादी छोडेर स्वतन्त्र भएका मुमाराम खनाललगायतका पूर्व माओवादी नेताहरु पनि नयाँ शक्तिको नेतृत्वमा आउने भएका छन् ।

नायिका करिश्मा मानन्धर,  निर्माता अशोक शर्मा, पूर्व एआईजी गणेश राई र पासाङ शेर्पा, केशवमान शाक्य लगायतका जनजाति समुदायका अगुवा नेताहरु पनि नयाँ शक्ति अभियमान लाग्ने भएका छन्।

यसमा तपाइको मत