साहित्यकार दामोदर पुडासैनी किशोरले नमेटिएका चित्रहरु नियात्रा कृतिका लागि अन्तर्राष्ट्रिय नेपाली साहित्य सर्वोत्कृष्ट पुस्तक पुरस्कार पाउनुभएको छ । अन्तर्राष्ट्रिय नेपाली साहित्य समाज, बोर्ड अफ ट्रस्टी अमेरिकाले उहाँलाई पुरस्कार प्रदान गरेको हो । 
सन् २०१२ देखि २०१४ सम्ममा विश्वभरबाट प्रकासित पुस्तकहरु मध्ये पुडासैनीको नियात्रा कृति नमेटिएका चित्रहरु सर्वोत्कृष्ट भएको हो । पुरस्कार वितरण समारोहमा विश्वका चालिस देशका साहित्यकारहरुको उपस्थिति थियो । पुरस्कार तथा सम्मान ग्रहण गर्दै साहित्यकार पुडासैनीले यस किसिमको अन्तर्राष्ट्रिय सर्वोत्कृष्ट पुरस्कार पाउँदा आफूमा थप उर्जा प्राप्त भएको र यस क्षेत्रमा लाग्न थप हौसला प्राप्त भएको प्रतिक्रिया दिनुभयो । अमेरिकामा भएको कार्यक्रममा समाजले नमेटिएका चित्रहरु कृतिलाई अंग्रेजी भाषामा अनुवाद गरेर विश्वभर बिक्री गर्ने जनाएको छ ।
विस २०१९ जेठ १८ गते काठमाडौंको जितपुरफेदीमा जन्मनुभएका पुडासैनीका आफन्तका अनुहारहरु, आँखाको खोजीमा, आलोकित आयाम, आकारको खोजीमा, समयको सहीछाप, पहाड र प्रेम, यात्राका प्रेमिल तरंगहरु, नमेटिएका चित्रहरु, मायालु हुम्ला, सिमानाका रंग : सिमानाका तरङ्ग जस्ता कृतिहरु प्रकाशित छन् ।
