रसुवा। रसुवाको उत्तरगया गाउँपालिका-५स्थित बनुवा घुम्तीमा सडक डिभिजन कार्यालयले निर्माण गरेको तारजाली (ग्याबिन) पर्खाल पुनः भत्किएको छ। यसअघि निर्माण गरिएका ग्याबिन पर्खालसमेत ढलिसकेको उक्त स्थानमा पटक-पटक पर्खाल भत्किँदा राज्य गम्भीर हुन सकेको छैन, जसले गर्दा राज्यको करोडौँ लगानी बालुवामा पानीसरह बनेको छ।
दीर्घकालीन समाधान नसोची ‘असारे विकास’ शैलीमा पर्खाल निर्माण गर्दा एकातिर राज्यको ढुकुटी रित्तिएको छ भने अर्कोतिर जोखिमपूर्ण सडकका कारण स्थानीय बासिन्दा र यात्रुहरू सास्ती भोग्न बाध्य छन्। टिकाउ प्रविधि र गुणस्तरीय कामको साटो बर्सेनि एउटै काममा बजेट सिद्धिरहँदा सम्बन्धित निकाय भने मौन दर्शक बनेको स्थानीयको गुनासो छ।
चर्चित रसुवागढी नाका जोड्ने पासाङल्हामु सडक खण्डअन्तर्गत पर्ने यो सडकसँग सिङ्गो रसुवाको अर्थतन्त्र जोडिएको छ। यो मार्ग यस जिल्लाको मुख्य लाइफलाइन हो तर यसैमा लापरबाही भइरहेको छ।
यसै सन्दर्भमा राष्ट्रिय स्वतन्त्र पार्टी (रास्वपा) का नेता तथा स्थानीय सरोज न्यौपाने भन्छन् -, “सडक विभागले यस्ता अति महत्त्वपूर्ण सडकहरू निर्माण गर्दा धेरै गम्भीर हुन जरुरी छ। यो सडक भनेको रसुवाको लाइफलाइन हो, यस सडकबारे दीर्घकालीन रूपमा बनाउन जरुरी छ ।”
बनुवा घुम्तीमा दीर्घकालीन रूपमा पर्खाल लगाउने योजना बनाउन सामाजिक संजालमार्फत स्थानीयहरूले माग गरिरहेका छन् ।
